HATA HUHUASI DI GAREJA

HATA HUHUASI atau KATA SAMBUTAN merupakan bagian yang tidak terpisahkan dari runutan acara pangolihon anak manang Pamulihon Boru. Biasanya Hata Huhuasi disampaikan oleh Ketua Punguan ataupun Dongan Tubu yang telah ditunjuk sewaktu mar ria raja atau martonggo raja. Namun kadang kala ditunjuk saat selesai ibadah pemberkatan. Hal seperti ini tidak baik untuk ditiru karena tujuan utama dari sambutan dikhawatirkan tidak tersampaikan dengan baik. Adong hata na tua tua mandok:  

Martampuk bulung, marbona sakkalan.

Marnata do suhut, marnampuna do ugasan.

Metmet do sihapor lunjung

Dijunjung do baringinna

Berikut ini adalah salah satu contoh “HATA HUHUASI”. Dari Pihak Paranak maupun Pihak Parboru. 
Contoh ini di tulis dalam bentuk ulaon taruhon jual (ulaon di alaman ni paranak).

Hata Huhuasi sian Suhut Paranak (Ulaon Di Taruhon Jual)

Horas... Na marjolo tama do hita mandok mauliate tu Amanta Debata Pardenggan basai, ala dilehon dihita hahipason dohot las ni roha, tarlumobi ma apalah di ari na sadarion ima di pesta pamasu-masuon Anak dhohot parumen nami. Mandok mauliate do tutu hami tu pangula ni huria nami dohot amang Pandita (dokkon goar na) naung pasahat on pasu-pasu parbogason di anak dohot boru ni huria i. Sai Tuhan ta na tongtong mangalehon hahipason dohot ganjang ni umur tu hamu laho pararaton Barita Na Uli di luat portibion. Suang songoni ma tu hamu na huparsangapi hami: raja ni dongan tubu, raja ni dongan sahuta, raja ni parboruon, raja ni ale-ale, tarlumobi ma di hamu raja ni hula-hula dohot tulang nami, dohonon nami ma godang mauliate malambok pusu di siala haroromuna tu bagas joro na badia on ima na laho mangadopi pamasumasuon ni anak dohot parumaen nami. Marhite on gomos hupangido hami tu hamu, dung sidung  hita annon sian bagas joro on asa marneang ni langka ma hamu angka aman ta raja dohot inang soripada asa rap udur ma hita tu inganan pesta unjuk naung huparade hami di Gedung .... na maralamat di ....... Asa rap ma hita di si marsipanganon indahan na las dohot minum aek si tio tio jala patupahon adat na gok tu hula-hulanta huhut manjalo adat na hombar tusi. Molo tung adong sian tonga-tonganta na so sahat dope gokhon dohot jou-jou sian hami hasuhuton, laos hatangkon ma nuaeng na manggokhon huhut manjou hamu. Hu ulahi hami ma mandok mauliate godang. Boti ma.

Hata Huhuasi sian Suhut Parboru (Ulaon Di taruhon Jual)

Punguan na mar las ni roha, di son jongjong do hami songon mewakili suhut parboru. Marulak-ulak situtu ma hita mandok mauliate tu Amanta Debata Parasi roha i ima na mangalehon ari nauli dohot ari na denggan di hita. Sadarion, nunga sahat manjalo pasu-pasu parbogason boru dohot hela nami marhite naposo ni Tuhanta. Tama do hami mandok mauliate tu hamu sude pangula ni huria nami na mangkobasi ditingkion suang songoni nang di amanta Pandita …….. Tu hamu saluhutna na huparsangapi : raja ni dongan tubu, raja ni dongan sahuta, raja ni parboruon, raja ni ale-ale, tarlumobi ma di hamu raja ni hula-hula dohot tulang nami, dohonon nami ma mauliate malambok pusu di sude na binahen mu tu hami sadari on. Sai Tuhan ta ma na pasahathon pasu pasu Na tu sude hamu na huparsangapi hami. Angkup ni i, songon naung pinaboa ni parboruon nami, nunga diparade parboruon nami sipanganon pesta unjuk di Gedung … na maralamat di ............... Ala ni i, dibagasan unduk dohot serep ni roha, gomos hami marpangidoan asa rap udur ma hita tu inganan pesta unjuk i laho mangan indahan na las dohot minum aek sitiotio, laos manjalo adat sian parboruonta huhut pasahat adat tu nasida mangihuthon hasomalan ta. Molo tung adong sian tonga-tonganta na so sahat dope gokhon dohot jou-jou sian hami hasuhuton, laos ditingki on ma hami manggokhon dohot  manjou hamu. Hu ulahi hami ma mandok mauliate godang. Boti ma.